ثلاثيات ليبية من الاخيررر

في ثلاثيات كثيرة فى العالم يتكلموا عليهم ... لكن هادى ثلاثيات فى ليبيا .... بس ... بس

تفضلوا ...

ثلاثة تسبب الإحباط : الواسطة ... و الديون ... والمنتخب الليبي .


ثلاثة صعب نتخلى عنها : الماء...والهواء...والبازين .


ثلاثة محتاجات واسطة : البعثات..والشقق...وأى مصلحة إدارية تبي تقضيها


ثلاثة يرفعوا الضغط : الملح..وزحمة المرور..والعيل كان عشش .
ثلاثة مايحبوهمش الليبيين : التعليم .. واليهود .. والشبشب المقلوب



ثلاثة تسبب الغرور : الفيلا... والهامر..وبدلة الحرس البلدي .


ثلاثة ياكلوا في لحوم البشر: الحيوانات المفترسة....والبزناسة الكبار ... وجماعة القرمة كان شبعوا .


ثلاثة لازم نتخلى عليهم : التفنيص.. والتلقيح....واللُّـقني وقت العمل .....


ثلاثة ما يرقدوش الليل : المديون.. والخانب.. وواحد نايضة عليه السوسة .


ثلاثة شبه اختفوا من ليبيا : الدلاع الطويل.. واحترام الشيابين ....والفراشية .


ثلاثة ما تحسش بطعمتهم الا في ليبيا : امبكبة على الحطب....وبورديم.....وشاهي العالة ...

ثلاثة يديروا فيها الليبيين بس : الهروب فى الاحمر .. والدفل ع بنبلى الغاز ..وتنفيض الفرشة من الروشن

ثلاثة تدعو لهم بالهداية : البلعوط ..والمحسدي.. والخنايسي .... يكفيكم شرهم


ثلاثة ما تستغربش منهم في ليبيا :

واحد قاص السريع على رجليه..... وواحد يسوق في الاتجاه العكسي ..... وواحد طالع في الاحمر..


ثلاثة كان مشوا تتمنى ما عادش يولوا : الفقر ..والمرض.. والبنت كان تزوجت .


ثلاثة تتمنى ما تصبحش فيهم : سواق افيكو مستعجل....وطابور طويل في الشيل.... والمدير المتعارك مع مرته ..


ثلاثة ربي يفكك منهم : مجاري مفتوحة......وكلب مطلوق .....والرشادة الطايشة .


ثلاثة ما ليهمش معنى إلا في ليبيا : العسلوز.. والزميطة.. والعصبان ...


خمسه لا تستخدم إلا في ليبيا : الحمّاس..والكانون.المجرده.الزكيه.والمغرف

هههههههههههههههههههههههههه ضحكتنى والله واقع ليبى

كثر الهم يضحك

تسلم وتقبل مرورى

يوههههههههههههههها يعطيك الصحة يا ولد سيدي بالله تشجيع قوي ليه تسلم والله الا كلامك فعلا مزبوط غير رد بالك من الرشادة الطايشة تجي في صلعتك بس
_________________________________________________

مشكور يا ادمن عالمرور وانت يا قارسة هههههههههه

ههههههههههههههههه هههههههههههههههههههه

كلام سليم ميه الميه


ثلاثة ما ليهمش معنى إلا في ليبيا : العسلوز.. والزميطة.. والعصبان

بس نبي نعرف شني

العسلوز

حتا اني نبي نعرف

شكرا عالمرور ياهنو وياخرفش ...
العسلوز هو عبارة عن نبتة وتنمو هده النبتة في بلادنا في فصل الربيع وهي نبته زهرية والوان ازهارها تكون صفراء وصغيرة وتقطف منها السيقان والأزهار فقط
وتدخل هذه النبتة فى مكونات وجبة الكسكسى وتسمى اكلتها وهى مشهورة جدا " كسكسى بالعسلوز" ... وتبو الحق انا امجربها وجبة من الاخير واكلها سنة 2000 ف تقريبا فى زوارة

اني قارصة يا ابن القرضابة باهي به