ناضت وهي توميله . العين بالغطا وتقول فايز جيله . طار نومها

ناضت وهي بغطاها . تومي بعد طيف الغوالي جاها .اصداف وين ما دوبه النوم غفاها . ومازال بين النوم والتعسيله .وقالت بعد زاحن غيوم سماها . وانفكن طلامس حلمها تاويله .يانوم عندي عين طال رجاها . وانت عارفه طول الرجا تبيله .ويانوم عندي عين ليش معاها . ردود زينها بعطيب توفي كيله.يانوم عندي عين كابر داها . وجياب الدواء غايب غياب الحيله.ويانوم عن...دي عين من غالاها . قدام العرب تقدر غلاه اتشيله .ويانوم عندي عين زول امناها . لوكان في اخر الدنيا تبي تمشيله.ويانوم ما كفت العين بكاها . الاوين مادارت عزيز عزيله .
ناضت وهي توميله . العين بالغطا وتقول فايز جيله . طار نومها
ناضت وهيه تشالي . العين بالغطا وتقول حيه الغالي .عليها خطر ساعة الليل التالي . وهي الليل ما تملك معاه الحيله .منين المليسه حاشها الزوالي . وخيط المساك ايبان دار فتيله .لاهو وقت حلم ولاهو وقت تسالي . امغير فكر لبنادم اوقات ايشيله .ويقولوا اللي في عقلك اتجي طوالي . تخرب وجابك تقلبه تعديله .ونا العقل ساكن فيه غالي مالي . عيوني وغالي وغاليه امفاعيله .قدام والدي وعمي وزاد خوالي . غلطت فيه وين (ازناد) بناديله .وقتله ونا غايض وصوتي عالي . شوف من اللي عالباب باك زويله.نلقاني من الصوب هذا حالي. واللي ماهو قايس صوب مانشكيله.اللي وين ما نفتح حداه سوالي. لاتقول هوه حداي لانحكيله.كيف من مشى مجرد في عرس ايطالي. ولا رسم في تركيا طبيله.خطرها الا غيت عيون الفالي . اللي العين مارامت ازويل بديله.بيض المصابي بونياب مجالي. غلاه سم في دمي ادافع سيله.غلاه نقش في ليرة ولي عصمالي. غلاه نحت فرعوني سطا ساطيله.غلاه كل مانكره ومايحلالي. وكل ماشبحت وكل ماصاغيله
ناضت وهي توميله . العين بالغطا وتقول فايز جيله . طار نومها
ناضت تقول امنايا . العين وين ما طيف العزاز تهايا .رقيقة اعزوم دموعها جرايا . على وسع ماقيها الدمع تهيله .ورا بنت تضاوا تقول مرايا . عناق ريم في فج البساط هميله .تخلي صناديق العقول شضايا . اتخف روز من كانن اخطاه ثقيله .
ناضت وهي توميله . العين بالغطا وتقول فايز جيله . طار نومها
ناضت اتقول الروقه . العين وينها والعقل خارب سوقه.الدايم الله فيها انحازت بوقه . وزاد الطرب غرب مساق رحيله.من يوم ما عليها بان سمح التوقه . وهي العين مازالت اتنوح عليله.الغالي اللي مابت لهايب شوقه . تطفا الا ماتزيد كان شعيله.ناري على كبدي اللي محروقه . اللي هاسها صوب العزيز بويله.بوعين لابانت اتدير ازروقه . وتخضار واتلاصف كيف لون النيله.اسهام في جواجيا اتجي مرشوقه . وين ما تواطي هذبها وتشيله.وقصه لياماحت وجت مفروقه . تسافا عليها دايره تضليله.تطاير يمين يسار سوقه سوقه . جريد ناقلاته ريح شيله بيله.تضامر لياطلت تقول حموقه . تجوشن امشوشها الخيل صهيله.تسارق ان جت تهمت اتقول بروقه . عضاها ان بانن ساعة التبديله.تعوقه على طول الزمان تعوقه . الناضر اللي بميامها ترعيله.تيبس دماه الساريه في عروقه . ويوقف النبض اتصيرله تعطيله.ويجف ريق فمه وزاد ريق حلوقه . ويحوس ويودر دروب سبيله.خطرها الا توصيف زول الطوقه . نسيز خاطري منها كثر تخبيله.جمالها رقي ما زين يرقى فوقه . فرقة غزال الريم في تمثيلهعيون من على فج الخلاء ورقوقه . جاسر الدوج ايديرله تجفيله.
ناضت وهي توميله . العين بالغطا وتقول فايز جيله . طار نومها

الشاعر: فاروق ازناد

ماشاء الله عليك ياخرفش

ليمونة المميز مرورك ياحناطه
ابن القرضابية مشكور علي مرورك